I padron dèla casìna Pedrina ièrun i fradei Monti; i gh'èvun tanta tèra che la rüveva fina a la Samartina.
Sèreme in prencipi dela guèra e un chicòs da mangià, o de rifa o de rafa, se truèva anca mò.
Pasade un ane de guèra, la corda la se strènseva, el pan l'èra poche e grame, i oltri generi pegiu, ...la gènte fra de lur ièrun cume una pügnata che buiva.
Vèn che i fitauli dela Pedrina i han caciade insèma dü campi e n'han fai vön sul; l'èra un campe "a vista d'öge" cume se disèva. E insì, el Signùr el gheva mis nel cör al padron da sumenà el campe a mèlga; …la stagion lèra giüsta e la mèlga la cresèva cume i spargi.
La vus l'èra 'ndai … prima ala Costa, pö in Busamartén e Busaroche e a tüte Sant'Angel. El colde el se fèva sentì e i füsi i perdèvun i barbisi.
Un chividön i fevun la pröva, ia purtèvun a cà e ià fèvun rustì sü le brasche, ma i fèvun amò el late.
Pasade el mès de lüi, i füsi ièrun grosi e marüdi, ma anca le biciclète cun i sachi i se ingrusèvun.
Un bel dì, Giuan el campagnon l'à mis al curènte el fitaul de quèl che sücedèva, ma el siur Monti el g'ha risposte: "La vendun?"
"No, la mangiun lur. Ièn pora gènte cun tanti fiulen!"
"Alura el campe lè so dla gente, lasa che la catun".
Nel campe, de dì, parìva da ves in mes a un nen de vèspe.
L'han ciamade "el campe di poveri", …ma ghe 'ndèva anca i siuri!
A Giuan el campagnon i ghe vurèvun tüti bèn, e quande i ghe paghèvun da beve i ghe disèvun: "Giuan, bianche o rus?" E lü el ghe rispundèva: "Tüti dü!".

CHIUDI ARTICOLO