Proseguiamo nella pubblicazione del “Dialogo tra i due Lambri”, rubrica apparsa su “Il Cittadino” negli anni ‘60; brani senza firma, da attribuire alla penna di don Ferruccio Ferrari. Il testo che segue è del settembre 1959 e il citato don Peppino è don Peppino Brusati, incaricato della cura spirituale del rione San Rocco, che andò ad abitare al Villaggio Pilota in attesa della costruzione del nuovo Oratorio.

- Spiégheme un po’ ti Lamber vive, cume mai ò viste pasà dal punte un spavènti de sanmartén föra stagion?
- Brau! Tel sè no? Ièn i sanmartén de tüti quei che va a sta al Vilagio Pilota.
- El Vilagio Pilota? Che roba l'è?
- Si, ièn le ca növe che l'à fai el siur Mariu (che adès l'è anca Cavalier); ch'èl fiöl lì èl g’à la testa che va a vapùr, na pensa vüna tüte le ur. E… l’à namò finide.
- Te disi dabòn?
- E ste vedesi che cà, che cà!
- O bèla? Cume ièn fai?
- L’è tüta una modernità che se pöde nanca imaginà. Scale de marmu, piastrèle, bagni, balcòn, lüs, fari e un lüsu straurdinari.
- Sì, ma chisà che rasa de fite!
- Quèl lì l'è gnèn. Püsè l’è ‘ndà in drèn, pö per èl pagà sème sèmper a tèmpe, la dis la gènte.
- Ma cun tanta gènte, chisà che cunfüsion?
- Tutto previsto! Perché la gènte, prima d’andà in cà, l’à gh'à da firmà el so regulamènte.
- E la rispètun almen?
- I giun i se abìtüun, ma i vegi i fan fadìga, anca bèn che le spuse ièn sèmper lì cui dènti nela pèl. E i ghe disun: “Papà, spüda no in tèra, l’è cuntra l’igene. Papà, cava le socule, te distürbi quèi de suta. Papà, vusa pian, te distürbi quèi de sura. Papà, lasa sta èl martél, se lamènta quei da chi, finisla da picà, te svegli quei da là”. Pori vegi ièn ala berlina. E pö, man, man, vèn l’ispesiòn.
- Per fa che roba?
- Per vède se gh'è mia de dani, se gh'è la disciplina, se tüte l'è a poste, se gh'è la pulisia. Se nel bagne gh'è no le damigiane, o la pita cun suta i övi, o pegiu amò s’ian fai no dela tualèta, (fati bèle capitadi) l’ula dei peveròn muiàdi.
- Secunde ti, la gènte l’è cuntènta?
- Cuntentisima. Ste vedesi quande dopu sèna i se mètun tüti al balcòn: i guardun e i se guardun e par che i disun, specialmènte ala sira: “Che aria da siuri che se respira!”.
- E i vegi?
- I tasun rasegnadi, i guardun luntàn e par che i suspirun: “Oh… la me Costa, oh... el me Busamartén, oh... la me Guatra, oh... la me via del Pelegrén!”.
- Quante robe te me disi! Spieghemene a mò vüna: ò viste tra tüti i sanmartén, vön che l’èra un po’ particular. Tanti libri e libri e libri e pö cumò e cumò e cumò. De chi l’èra?
- Quèl lì l'èra el sanmartén de Don Pepén. I libri ièrun so, ma nèi cumò gh’èra la dota dela siura Virosia.
- La vurarà mia amò spusàs?!?.
- Dis che l’avares dì che nèla vita se sa mai.
- E Don Pepén s’el va a fa al Pilota?
- Eh, car el me Lamber Morte, ti te me grati ‘nduè che me fa spürina. Gavaresi tante robe da dite, ma g’ò da finì. Te basta savè che grandi cose bollono in pentola, che fra des ani, il nostro Borgo el sarà pü la cenerentola de Sant’Angel, ma una Parrocchia nuova, un Comune nuovo, con un nome nuovo…Comune di San Rocco Barasa. E al punte metarème un cancèl, cun un guardiàn che disarà ala gènte: “Avanti quèi dala facia nèta, tüti i oltri indré, e guai a voi se passate il Mincio”. Ste disi ti Lamber morte?
- Te vèdi Lamber vive, son adré a pensà, che te sèn un bèl cavafià, e che tra il dire e el fare gh'è no dü Lambri, ma tutto il mare!