Proseguiamo nella pubblicazione del “Dialogo tra i due Lambri”, rubrica apparsa su “Il Cittadino” negli anni ‘60; brani senza firma, da attribuire alla penna di don Ferruccio Ferrari. Il testo che segue è dell’ottobre 1959, anno particolarmente significativo per Sant’Angelo con l’inaugurazione della chiesa di S. Maria Regina il 24 maggio, la posa della prima pietra della Casa di Riposo il 20 settembre e il ricordo dell’eroismo di don Nicola De Martino con la attribuzione, da parte del Comune, del titolo “Defensor civitatis”.

La cesa de Busantamaria, la casa di riposo e don Nicola

- Dìme un po’, Lamber Morte, che fracàs i fai in Bu-santamaria, in duè che gh’è la cesa de Don Carlu?
- Ah lì, in de cla cesa lì ian fai in cle stemane chì tanti spusalisi, che Don Carlu l’era strache cume un frè.
- Ma i van pü in cesa granda a spusas?
- Amò! Se capìs, ma ièn in si tanti che èl prevoste l’ha dì che fa gnèn, pür da pagà el distürbe, a spusas anche nei quartieri.
- Ièn propi in sì tanti i spusi e le spuse?
- Següra, adès bèle e brüte i se spusun tüte: giune, vege, siure e puerète, de tüte le categurie.
- Anca quèle dell’Asion Catolica?
- Quèle lì? I gh’an el vènte che spira in so favur. È scoccata la loro ora.
- Benone, forsa fiöle, purtèves inanse e fèvès curage. Però in Busantamaria ian sunàde una duminica anca la banda: se gh’era?
- Ho capide, ti te vöri savè un’altra roba. La banda l’à sunàde per la prima pietra dell’Ospizio Vecchi. (Ma adès se dis pü i vegi, bisogna dì i ansiàn). È vegnüde anca èl Vesche e l’à dì tante bèle robe e pö el gh’à fai gli unuri al prevoste perché el gh’à pensade a fa èl ricover de tüti i pori vegi del pais.
- Següra che l’è ‘na bèla roba.
- E pür, te credaresi, ti Lamber Vive, che a Sant’Angel gh’è stai dela gènte che ian criticade el prevoste per cla roba li?
- Ma chi l’è cl’è stai?
- Se sa, i soliti sbaüson che tüte el dì nei café, i g’an gnent’olter da fa che criticà.
- E si avaresun dì?
- Ian dì bèl e bèn ch’el prevoste, pütoste che tra via i migliòn per i vegiòn l’èra mèi ch’el fèva tante squadre de balòn.
- Che sensa sentimenti! Bèn Lamber Morte, me te fo ‘na prufesìa: chi giun lì, che ian parlade insì, i deventaran vegi, e quande le so spuse, per liberas, ia mandaràn a cercà el poste ne l’uspisi, ghe sarà quel che se regurdarà da dighe: “Violtri nei vegiòn? Mai pü, ‘ndè a giügà al balòn!”.
- Brau Lamber Vive, son cun ti, che la roba la ‘ndarà a finì insì.
- Bèn e per finila, l’è vira che in chela domenica lì al Cugüs ian fai sante Don Nicola?
- Ma no! Don Nicola l’era sante anca prima, de mo la pasiènsa ch’el porta!
- Cun chi l’è?
- Cun la so malatia, por ome. Püsè che sante, se trata invece che l’han fai eroe.
- Eroe? Cume se fa a deventà eroe?
- Bisogna riscià la vita per la patria. E lü l’à risciada tante volte in tèmpe de guèra, principalmènte quande l’è stai ustage in man ai tudèschi. Ièrun mia gnuranti quèi là. Per pasà da Santangel ian ciapàde un prète. “Prima da sparà su nöme, ian dì, spararì sül prète”. E nöme o gènte! Ghèveme da sparà sü Don Nicola? Sème stai tüti quieti intante che lü èl pasèva süi cari armati; ma lü èl ghèva no pagüra, èl sèva che nöme èl sèvème che ghèvème da sta fermi. In chi di là sèrème tüti un po’ eroi.
- Alura ne tuca anca nöme la medaia d’ora.
- Certo! E èl sindeghe nel dagla a lü l’è cume se nl’aves dai un toche a tüti nöme.