Me slo fai di no du volte
ma cumpari d’una saèta
ciapa in spala el me fagote
cula tila e biciclèta:
carga tüte sül vapur
e son gnüde a cà in votur.

Vegni su dala curiera
guardi in piasa un mumentén,
la me gènte” una bandiera
dala tur al campanén:
tüti in festa e per de pü
tute cos cul cü in sü.

Fiuri in volte e fin sül mür,
cèri a bas e cèri in ciel
le ca ruse de pitür,
e sül tèce del Castél
du trumbète quasi blö
chi parivun pedriö.

“Lè la Radiu dela Mustra”
sènti a dì da una vus
“Se te dì che lè una giustra?”
Ghe dumandi un po’ curius,
ma quèl la (s’lavrà capide)
el se masa dala ride.

“Lè un’espusisiòn sül seri”
el me dis un oltr’amis,
“Per fa vède ai furesteri
le belèse del pais;
te sè no che in funde in funde
lè el püsè bèl pais del munde?”

Me a sentì ‘na roba pari
me vegnüde una pasion,
che sler non un chi cos de rari
a fas vède un caragnòn,
me metèvi in un cantunén
a sgarì cume un filén.

Ghea resòn me sia Carluna,
quande seri picinén,
che de gènte in si buna
de si volti campanén
e un castel cume lel noste
se na tröva in nisön poste!

Lè che ghevi da gni via,
se de no cun po’ de tola,
prima a mò d’andà a cà mia,
‘ndevi a dighe a Don Nicola
“Chel ghe mèta in un padigliòn
anca questa iscrision”.

“Siure e siuri furasteri
se ghi in mènte un desideri
da gni a vède el bèl Sant’Angel,
preste o tardi, in vista fèl,
che si viste no Sant’Angel
i mai viste gnèn de bèl”.

Don Ferruccio Ferrari