Batistòn, l’èra volte dü metri e semper sensa danè. D’estade, el se rangèva a fa tüti i mestè per tirà inanse, ma d’inverne èl feva no tempe a "pelà e tra via", cume se disèva a Santangel, quande vön èl mangeva no a sé.

Batistòn, un dì, al Pusòn, èl tröva èl so amìs Giuanén dla Pitàca e cun la facia de tola èl ghe dis:

"Giuanén imprèsteme, se te pödi, cinquanta franchi per pagaghe le castègne al Lüsén". Ma l’èra una scüsa e Batistòn, per un po’ èl s’ha fai vède pü in gir.

Quande finalmente Giuanén l’ha truade e èl g’ha dì da daghe indrè i so danè, Batistòn èl g’ha fai capì che l’èra a bulèta e da spetà ancamò.

Giuanén l’ha perse la pasiensa: "Te farò ciamà dal Pretur" e Batistòn l’ha fai nanca ‘na piega.

Vèn èl dì d’la cumparisiòn e Batistòn l’è ‘ndai a truà Giuanén per dighe che lü èl sares vegnüde dal Pretur, ma èl ghèva nanca una giaca da mète sü. Pür da vèdel cundanade, èl so amis Giuanén, èl g’ha prestade la so giaca.

Quande cumènciade l’udiènsa, Batistòn èl va arènta al Pretur per dumandaghe se èl pöde dighe dü parole in privade. El giudice èl sèva che Batistòn l’èra debitur de Giuanén d’la Pitàca, ma Batistòn èl ghe dis: "Me g’ho gnèn da daghe a Giuanén, lè lü che lè malade e el se mis in testa tante robe, èl guarda, siur Pretur, quande me sarò un po’ luntan, èl fasa finta de gnèn, ch’èl ghe dumanda de chi l’è la giaca che g’ho sü; l’è bon da rispundeghe che lè la sua…, da lì el capirà che l’è malade, ghe vör pasiensa, siur Pretur!"

Giuanén èl vèn intèrugade: "Dunque, lei ha prestato cinquanta lire a Battistone?"

"Sacrusante, siur Pretur, èl vör pü dami indrè!"

"Dimmi Giovannino, di chi è la giacca che indossa Battistone?"

"L’è mia, siur Pretur".

"La seduta è tolta".

Da ch’el dì là, Giuanén l’è stai ciamade "Giachèta" e l’ha pèrse l’amis, la giaca e… i cinquanta franchi.

Mario Bagnaschi