Poeti barasini

   L’invito rivolto, nel numero scorso, ai poeti santangiolini di inviarci le loro composizioni dialettali, è stato accolto favorevolmente da Pietro Tonali, anch’egli partecipante all’incontro di Montanaso Lombardo del 26 ottobre 2002.

   I componimenti del trentasettenne barasino Pietro Tonali, per il loro contenuto fresco, istintivo e spontaneo, rappresentano un’inaspettata rivelazione per i cultori di questa forma espressiva che affonda le radici nella più autentica tradizione della nostra borgata.

   Siamo lieti di offrire all’attenzione dei nostri lettori “La scatula dei ricordi”, lirica che si è piazzata al terzo posto al concorso nazionale “Poesia dai colli” di San Colombano al Lambro, nell’edizione dell’anno 2002.

a.s.

La scatula dei ricordi

Ghè no un poste bèn precìs
in de mèti,
i pödun ves in un casète…
in un vege armadiète…
in una scatula de tola…
o in un album…
tacade cun la cola.

Futugrafie in bianche
e neghèr
cun i anguli smangiadi
che ièn propi lì a ricurdate
quante primavere ièn pasade.

Futugrafie che te se nò
in de ièn stai fai…
Cun persune
che te sé nanca
pü che fen ian fai.

Futugrafie dei noni…
cun de chi barbisòn…
che da fiulèn…
i te metèvun sügesion.

Futugrafie fai a persune
che te ghè vursüde bèn…
che magari…
t’a bèle purtade via
el destén.

L’è bèl fai pasà
ogni tante…
magari de nascundòn…
cu nei ögi un lacrimon…
che el ghe ries no a lavà via
i ricordi de una futugrafia.

Pietro Tonali

Le storie de Caluta

   Quande s’èri un fiulen, a la Vignöla, gh’èra tanti che ghe piasèva cüntà sü le storie. Gh’èra el Vanu (Rafaèl) ch’el parlèva de la guèra quindes-desdote, Zidor cun i Paladini de Francia e Caluta cun le so aventüre.

   Caluta, de mesté ghe n’èva mia, ma tanta buna vuluntà…prò, apèna per un dì, perché el dì dope l’èra strache. L’èra el so pan quande la ciamèvun per spasà le rüdère.

   Quande nöme fiöi ndèvème a fase cüntà sü le storie, se la ghe girèva bèn, prima èl te guardèva in facia pèr vèdè se sèrème seri, e dope el cumincèva: “Un dì, i latè dela Baslina, i Lucatelli, i m’han ciamade per andà nel so orte a catà i galfiòn; la pianta l’èra volta, ma me sèri cume un gate, sü e zu dala pianta. Evi quasi finide, quande una broca la se rumpe; s’èri un po’ in volte e, nel saltà, una broca de galfiòn la me se infilsada nèla spala. I m’han purtade a l’uspedal dal brau dutur Moretti, ch’el m’ha sübite uperade. Ma nèla ferida m’è restade drèn un toche de lègne, che tüte le primavere el b üta. Me tuca sèmpèr andà a fal pudà”.

   La storia l’èra sèmper quèla!

Mario Bagnaschi