Quande el Signur el se fermade dal frè
dla Guatra
I cüntèvun che 'na volta Gesü Cristo
l'è pasade da Sant'Angel cun el so asnén. La pora bestia
l'èva pèrse un fèr, alura el Signor l'è
'ndai dal freròn dla Guatra. Anca se urmai el fèva pü
gnèn, l'à pisàde la füsina e in poche tempe
el g'à mis el fèr a l'asnén.
Nella foto: una botega santangiolina di maniscalco (el frè).
Il gruppo ritratto è la famiglia Cerri
ed il luogo l'attuale piazza dei Caduti
"Quante te vöi?" el ghe dumanda Gesü. "Gnèn"
el ghe rispunde. El Signor alura el ghe dis: "Ciàmeme
una grasia, che me t'la do". El freròn: "Vuraresi
che quande cumandi un chicòs, la gnarés vera".
"Va bèn" el ghe rispunde el Signur.
A metà matina ruva i soliti fiöi a fa tribulà el
frè. Quande bèl e bèn i s'èn setàdi
su la banca de lègne, el freròn el dis: "Sì
fiöi, stè lì". I pori fiöi ièn
restàdi cume inciudàdi e i à tegnüdi in
cla pusisiòn lì fina a sira.
I ani i pasèvun e un dì d'estade ghe ruade la morte,
cun in spala el fèr da prà, a dighe che l'èra
ura d'andà. "Son prunte – el ghe rispunde el freròn
– ma, … laseme lavà le man che ièn burdeghe,
intante guarda che bèla pianta de fighi ghè lì
föra".
Cun un salte, la morte la va sü la pianta de fighi e, el freròn
el ghe dis: "Te sèn lì, … stàghe!"
La morte la s'è misa adré a vusà: "Laseme
'ndà, se de no el Signur el me licenzia e dopu me tuca murì
anca me".
"Me, te lasi 'ndà, ma ti te ghè da firmame una
carta che per trent'ani te vègni pü a cercame". E
la morte l'à duvüde cede e firmà, se nò
muriva pü nisön!
Insì el santangiulén per el fèr de l'asnén
l'à imbruiade la morte.
Morale: "Chi l'è che gla fa ai santangiulén?"
Mario Bagnaschi
